A numeración é a consecución dun número tras
outro. De moi pequenos comezamos a ter contacto cos números cando aprendemos a
representar os nosos anos cos dedos das mans, cando contamos dous ollos, dúas
orellas, un nariz e unha boca, ...
É importante que a medida que aprendemos a
contar, establezamos unha relación entre a grafía de cada número e a cantidade
que este representa. Esta será unha das bases máis importantes para a
aprendizaxe das matemáticas.
Neste sentido vos amoso dous dos primeiros materiais que realicei para a aula de PT, podedes imprimilos, recortalos e
plastificalos se queredes que vos aguanten máis tempo.
- Crebacabezas número – cantidade, pódese traballar a modo de crebacabezas recortando pola liña descontinua.
- Número – cantidade, cada tarxeta ten un número do 1 ao 10, haberá que colocar tantos garavanzos, pompóns, ..., como indique o número da tarxeta.
Dun xeito máis caseiro, con pinzas de tender
a roupa, ademais pódese traballar a motricidade fina; colleremos un cartón ou
algún papel que teñamos pola casa, escribiremos un número e haberá que colocar tantas
pinzas como o número nos indique.
Tamén, se tedes un cartón
de ovos, podedes pintar un número en cada oco co fin de colocar tantos
elementos dentro como indica o número aí escrito. Podedes traballar con
garavanzos, pompóns, boliñas de plastilina, lentellas, ... calquera cousiña que
atopedes na casa.
Outra opción é empregar vasiños de iogur.
Cada vaso terá un número pintado, e dentro haberá que colocar paliños de polo, palliñas,
calquera elemento que sirva para cuantificar.
Agardo que contedes moito...!
Ningún comentario:
Publicar un comentario